XV-XVI ғасырлардан бастап қазақтың өзіндік төл әдебиетінің іргесі қаланып, әдеби тілі қалыптасады. Осы кезден бастап әдебиет тарихында қазақ авторлары, жеке жыраула-ры мен ақындарының есімдері белгілі болады. Дара ақындық творчество бой көрсетеді.
Профессор Е.Ысмайылов айтқандай, жыраулар да ақын, көркем сөз шығарушы өнерпаз, ауыз әдебиетінің өкілдері. Жыраудың ақыннан өзгешелігі шығармаларының сарыны мен тақырыбы бірыңғай болып келуінде. Адам басындағы қайғыны, зарды, ел ішіндегі ауыртпалықты толғау, әлеуметтік, елдік мәселелерді көтеру, тағы басқа әр түрлі өткен-кеткен көңілсіз күйлерді шерту, болашақты болжап, ақыл айтып, батагөйлік ету, шешендік түйіндер жасап, терең ой қозғау - жыраулардың дәстүрлі ерекшеліктері. Бірыңғай тарихи тақырыптарды, әлеуметтік-қоғамдық мәселелерді, ерлер мен хандар ісін, елдің жай-күйлерін, қонысын, өткені мен болашағын толғап, осы мәселелер төңірегіндегі өкініштер мен өксіктерге бой ұра, кейде тіпті зарыға жыр толғап отыру-жырауларға тән қасиет.
Қазақтың есімдері ел аузында жүрген жыраулары көп-ақ. Бірақ олардан бізге жеткен мұра жоқтың қасы. Мысалы, проф. Ә.Марғұланның айтуына қарағанда, Махмут Қашғари сөздігінде Шөже жырау аталады екен. Ол XI ғасырда көшпелі түріктерден шығып, көп жыр білген жыршы болыпты.