Маҳмудхўжа Беҳбудий фаолияти кўп қиррали. У биргина адабиётнинг публицистика, драматургия, адабий танқид соҳаларига оид тадқиқотларни яратди. Беҳбудий зукко тилшунос ҳам эди. Ўзи ташкил қилган “Ойна” журналида нафақат тил ва адабиёт масалаларига оид, балки, тарих, география, ҳуқуқ, ахлоқ масалаларига доир қизиқарли мақолаларни бериб борди. Беҳбудий миллатнинг маънавияти ва маърифатини кўрсатувчи ойна - унинг адабиёти ва тили эканлигини чуқур англади. Мазкур масалаларни ўзининг “Икки эмас, тўрт тил керак”, “Жаҳолат дардларидан”, “Танқид-сараламоқдур”, “Сарт сўзи маълум бўлмади”, “Тил масаласи” каби қатор публицистик мақолаларида ёритиб берди. Мазкур мақолаларда муаллиф ягона адабий тил ва унинг софлигини сақлаш, тил ўрганишнинг миллат тақдири ва маданиятида тутган ўрни ҳақида баҳс юритади.