Халқларнинг ўзаро алоқаларини норматив асосда тартибга солиш эҳтиёжи давлат пайдо бўлишидан анчагина илгари сезила бошлаган. Ҳатто қабилалараро муносабатларда ҳам, гарчи улар давлатлараро муносабатлардан фарқли ўлароқ, сиёсий мазмун касб этмаган бўлса-да, ана шундай норматив тартибларга эҳтиёж бўлган. Қабилалар ўртасида тинчлик, қўшма жанговар юришлар, мулкдаги чеклашлар ва бошқалар тўғрисида битимлар тузилган. Шунингдек, бу борада муайян урф-одатлар шаклланган.