Диссертация мавзусининг долзарблиги ва зарурати. Очиқ ахборот тизими шароитида жаҳон миқёсида шахс, жамият ва давлатнинг ахборот, ахборот-психологик хавфсизлиги билан боғлиқ глобал муаммоларни ҳал қилишнинг аҳамияти янада ортиб бормоқда. Бугунги информацион курашлар, мафкуравий ва ғоявий жараёнлар кескинлашган таҳликали ва мураккаб даврда ғоявий қарашлари бир қадар беқарор ёшларни турли мафкуравий хуружлардан асраш, тинч ва осойишта ҳаётимизга хавф туғдириши мумкин бўлган тазйиқларга қарши изчил курашишга ундаш, уларда жамият ва унинг аъзоларига нисбатан онгли муносабатни шакллантириш, содир бўлаётган воқеаларга дахлдорлик ҳиссини қарор топтириш айниқса долзарб аҳамият касб этмоқда.