Малака ошириш самарадорлигига эришишнинг яна бир омили курс давомидаги амалиёт машғулотларининг талаб даражасида ташкил этилишидир. Тингловчилар амалиёт машғулотларида курс давомида олган назарий билимларининг, ўрганган услубий янгиликларининг таълим жараёнида қандай қўлланилишини амалиёт машғулотларида кўрадилар. Шунингдек, улар ўзларининг иш жараёнидаги фаолиятларини таянч таълим муассасасидаги касбдошлари иши билан қиёслайдилар ва ана шу қиёслаш орқали қайси ишни тўғри, қайси ишни нотўғри қилганликларини баҳолаш имконига эга бўладилар. Амалиёт машғулотларида кузатилган дарснинг ижобий ва салбий жиҳатларини таҳлил этиш жараёнида фаол иштирок этиш орқали ўзларининг услубий билим даражасини синаб кўрадилар, ҳамкасбларининг ҳам фикларини эшитиб мазкур билимларга тегишли ўзгартиришлар киритадилар. Машғулот таҳлилидан ташқари вақтларда таянч таълим муассасасидаги ишлар билан танишиб у ердаги ижобий янгиликларни ҳам ўрганадилар.