Мустақиллик – бу, фалсафий тил билан айтганда, катта имкониятдир. Бизга маълумки, ҳар қандай имконият ҳам воқеликка айланавермайди. Мустақиллик деб аталмиш буюк имкониятдан қай даражада фойдаланиш халқнинг саъй-ҳаракатига боғлиқ. Халқлар борки, тарихнинг мазкур имкониятидан аъло даражада фойдалана билганлар ва инсоният цивилизациясининг олдинги ўринларидан жой олишга муваффақ бўлганлар. Осиё ва Жанубий Америкадаги қатор мамлакатлар эндиликда мустамлакачилик тизгинидан халос бўлибгина қолмай, янги дунё қоидаларини яратишда фаол иштирок қилмоқдалар.