М.Расулова
Ҳозирги кунда замонавий таълим тизими тобора янгиланиб бормоқда, тез ўзгараётган, мураккаблашиб бораётган оламда қўйилаётган замонавий талаблар асосида фаолият кўрсатишга тўғри келмоқда. Айни пайтда таълим тизимида раҳбарликнинг иш услублари, бошқарув маданияти ва бунинг натижасида сифат ўзгаришлари учун имкониятлар яратувчи педагогик, бошқарув янгиликлари пайдо бўлмоқда. Буларнинг барчаси таълимни ва унинг асосий таркибий қисми бўлган сифатини бошқариш масалаларининг ечилиши мураккаблашувига олиб келади ва бу эса муаммони ҳал қилишнинг замонавий асосланган усулларига эҳтиёж туғдиради.
Албатта, бу ўзгаришлар мактаб раҳбарларидан жуда кенг кўламда ташкилотчилик, яратувчанлик бошқарув менежментини эгаллаганликни талаб этади. Шу маънода мактаб директорининг ўрни ва масъулияти жуда каттадир. Раҳбарликнинг луғавий маъноси ҳам, зарурий хислатларни аввало ўзида шакллантириб, сўнгра ўз фаолиятида шу хислатларни намоён қилиш орқали жамоага ўрнак кўрсатиб, белгиланган мақсадни амалга оширишга жамоани жалб этишни билдиради. Чунки жамоа биринчи галда раҳбарлик салоҳиятини, унинг маънавияти, юксак маданияти ва халқпарварлиги билан ўлчайди. Шу боис раҳбар кадрларни танлаш, уларни малака ошириш курсларида муайян бошқарув тайёргарлигидан ўтказишга алоҳида эътибор қаратилмоқда.