Давлат санъат музейининг Ўзбекистон халқ амалий безак санъати, Ғарбий Европа, хорижий Шарқ ва Россия санъати бўлимларида кўплаб миниатюралар мавжуд. Уларни турли йўналишлар – мавзуси, жанри, мактаблари, муаллифлари, музейга келиб тушиши ва қабул қилиниши бўйича, ундан ташқари амалий санъат ва тасвирий санъат асарлари сифатида туркумлаб ўрганиш мумкин.
Буюк мусаввир Камолиддин Беҳзод Шарқ миниатюрасига кўпгина янгиликларни олиб кирди. Жумладан, композицияга пейзаж, портрет жанрини биринчилардан бўлиб киритди. Ўз асарларида мутаносибликни очиб бера олди. Эътибор берилса, олдинги пландаги фигуралар орқадагиларга нисбатан бир оз катта қилиб чизилганлигини кўриш мумкин.