Ҳар бир халқнинг жаҳон маданияти саҳнасида бошқаларга кўз-кўз қилгудек бебаҳо бойликлари бўлади. Ўтган буюк даҳолар салоҳияти, маданий бойликлар, илмий-маънавий мерос ва бошқалар шулар жумласидан. Улар орасида, айниқса, аждодлар маънавий мероси алоҳида тенгсиз хазинадир. Зеро, мазкур хазина нафақат ўз даврининг ютуғи, балки авлодларнинг келгусидаги маънавий салоҳиятига мустаҳкам замин бўлиши билан ҳам характерлидир. Асрлар давомида бойиб келган ўзбек халқининг мазкур хазинаси бу каби бебаҳо дурларга тўла эканини жаҳон халқи эътироф этади. Шубҳасизки, Амир Темур Тарағай Баҳодир ўғли Кўрагоний мазкур хазинанинг бебаҳо дурларидан биридир.