Uglevodlar tirik organizmlar, ayniqsa o’simliklar olamida keng tarqalgan organik moddalardan biridir. Ularning asosiy vazifasi hayotiy jarayonlarni energiya bilan ta`minlash bilan bir qatorda, nuklein kislotalarning tarkibiy qismlaridan biri bo’lib hisoblanadi. Shuningdek ular ayrim kofermentlar, vitaminlar, antibiotiklar va boshqa biologik faol moddalar biosintezida asosiy xomashyo hisoblanadi. Ulardan tegishli biokimyoviy reaktsiyalarda aminokislotalar, yog’lar va boshqalar sintezlanadi. Uglevodlar oqsillar va lipidlar bilan kompleks hosil qilib (glikoproteinlar, glikolipidlar) membranalarning tashkil topishida va ular faoliyat ko’rsatishida ishtirok etadi.