Дунё қишлоқ хўжалигида юмшоқ буғдой (Triticum aestivum L.) энг муҳим бошоқли дон экинларидан бири ҳисобланади. Буғдой ҳосилини 2017-2027 йиллар мобайнида 740 млн. тоннадан 833 млн. тоннага етказиш кўзда тутилмоқда ва бу дунё миқёсида дон ишлаб чиқаришни 13% ошишига олиб келади . Сўнгги йилларда глобал иқлим ўзгариши буғдой ҳосилдорлигига, доннинг тўлиқ шаклланиши ва сифатига кучли салбий таъсир кўрсатмоқда. Буғдой етиштирувчи давлатларда бу экиннинг серҳосил, дон сифати юқори, касаллик ва зараркунандаларга, ётиб қолишга, муҳитнинг ноқулай омилларига чидамли навларини яратиш бўйича селекция ишларини олиб боришга катта эътибор қаратилмоқда.