Республикамизда пиллачилик тармоғини янада ривожлантириш учун Ўзбекистон Республикаси Президентининг (1998 йил 30 март, 2000 йил 15 март, 2003 йил 22 декабр, 206 йил 15 ноябрдаги) фармонлари чиқарилиб, Вазирлар Маҳкамасининг (1998 йил 3 апрел, 2000 йил 3 апрел, 2003 йил 9 сентябр, 2006 йил 15 ноябр) қарорлари қабул қилинган. Фармон ва қарорларда озуқа базасини мустаҳкамлаш учун янги тутзорлар барпо этиш ва тутнинг янги, сермаҳсул навларини яратиш, қурт боқишнинг янги технологиясини қўллаш, тайёрланаётган пилла салмоғини кўпайтириш ва унинг сифатини яхшилаш, ипак қуртининг янги зот ва дурагайларини ишлаб чиқаришга тадбиқ этиш вазифалари кўрсатиб ўтилган. Муаммони ижобий ҳал қилиш учун ипак қуртининг янги зот ва дурагайларини яратишда ипак маҳсулдорлигига таъсир этувчи омиллар ва қурт боқишдаги муҳим жараёнларни яхши таҳлил қилиб, улар ўртасидаги ўзаро боғлиқликни ўрганиш ва уни селекция-наслчилик ишларида қўллаш мақсадга мувофиқдир.