Қишлоқ хўжалик маҳсулотларини ишлаб чиқаришни жадаллаштириш, минерал ўғитлардан ва пестицидлардан юқори миқдорда фойдаланишни ва тупроққа кўплаб ишлов беришни тақазо этади. Бу ҳолат ҳосилдорликни ошириш билан бирга йиллар давомида шаклланган агроценознинг бузилишига олиб келади, бу эса ўз навбатида ўсимликнинг атроф – муҳитнинг ноқулай шароитларига чидамлилигини камайтиради. Ўзбекистон Республикасининг бўз тупроқларида фосфорнинг асосий қисми апатит типидаги кальций билан кийин эрувчан бирикма ҳолида бўлиб, кўплаб етиштирилаётган экинлар уни ўзлаштира олмайди. Йиллар давомида тупроқни ўғитлаш ўсимлик қийин ўзлаштирадиган фосфор бирикмаларининг катта миқдорда тўпланиб қолишига ҳамда тупроқнинг физик – кимёвий таркибининг ноқулай ўзгаришларига сабаб бўлади.