Vitaminlar oziq-ovqat tarkibida uchraydigan oziqa omillari jumlasiga kirib, organizmda sodir bo’ladigan moddalar almashinuvini boshqarilishida ishtirok etish orqali biokimyoviy va fiziologik jarayonlarni me’yoriy chegarada kechishini ta’minlaydigan moddalardir. Bu moddalar organizm uchun juda ham oz miqdorda talab qilinishi bilan birga, organizmning ular bilan ta’minlanishiga bevosita bog’liq bo’lgan avitaminoz, gipovitaminoz va gipervitaminoz xolatlari ham uchrab turadi.
Bakalavr akademik darajali biologlar tayyorlashda Biokimyo fanini «Vitaminlar» ga oid ma’lumotlarini ko’p qismini mustaqil ta’limga ajratishga to’g’ri kelganligi sababli ushbu bo’limga tegishli ko’p ma’lumotlar e’tibordan chetda qoladi. Bo’lajak magistr akademik darajali «Biokimyogar» mutaxassislar uchun bu bo’limga oid materiallarni bilish, ular bo’yicha ko’nikma, malakaga ega bo’lish muhim ahamiyatga ega. Shu sababli «Vitaminlar va ularning ahamiyati» kursini aloxida fan sifatida o’qitilishi maqsadga muvofiqdir.