Журналистнинг касб этикаси тушунча сифатида жаҳон журналистикасида узоқ тарихга эга. У амалий жиҳатдан қанчалик кўп ўрганилган бўлса, назарий нуқтаи назардан ҳам шу қадар атрофлича ва батафсил тадқиқ этилган. Бироқ барча фанларда бўлгани сингари давр ўтгани сайин муаммонинг янгидан-янги қирралари намоён бўлаверади, мутахассислар, шунингдек амалиётчилар эса уни ўрганишда, тадқиқ этишда давом этаверадилар.
Ўзбек журналистикасида касб одоби масаласи бевосита Ватанимиз мустақиллиги йилларида алоҳида фан, алоҳида амалий муаммо сифатида кун тартибига чиқди. Бу жамият миқёсида олиб борилган демократлаштириш, ахборот жамиятини барпо этиш жараёнлари билан чамбарчас боғлиқ. Матбуотда сўз эркинлигига йўл очилиши, хусусан, цензурага барҳам берилиши ўз-ўзидан журналистлар зиммасидаги масъулият туйғуси кучайишига олиб келди. Тегишли ҳуқуқий меъёрларни етарли даражада англаш, фаолият жараёнида касб этикаси талаб ва шартларига риоя этиш, шунингдек, ҳам инсоний, ҳам фуқаровий ахлоқ мезонларига бўйсуниш зарурлигини ҳаётнинг ўзи кун тартибига қўйди.