Тиббиёт фани ва соғлиқни сақлаш амалиётининг йилдан-йилга ривожланиб бориши, замонавий тадқиқот услублари, диагностик воситалари ҳамда компьютер технологияларининг тиббиётнинг барча йўналишларига кириб келиши билан характерланади. Буларнинг барчаси бўлғуси шифокорлардан физика, математика ва техникавий фанлар, хусусан «Тиббиёт электроникаси» бўйича назарий ва амалий билим даражаларини янада ошириб боришни талаб қилади. Шу сабабли ушбу дарслик «Тиббиёт техникаси» - фани намунавий дастурига мос тарзда ишлаб чиқилган бўлиб, тиббиёт асбоб ва ускуналарини қўллашда, уларнинг вазифалари, техник характеристикаси, тузилиши ҳамда ишлаш принципи, қурилмаларни ишга тайёрлаш ва ишлатиш ҳамда барча қурилмаларда қандай техника хавфсизлик чораларига амал қилиш –алоҳида кўрсатиб ўтилган. Дарслик Олий ҳамширалик иши йўналишида таҳсил олаётган талабалар учун мўлжалланган.