Agrosanoat majmuasi tarmoqlarida moddiy rag`batlantirish tizimi va mehnatga haq to`lashni takomillashtirish

Mamlakatimizda olib borilayotgan iqtisodiy islohotlar iqtisodiyotning barcha tarmoqlarida amalga oshirilayotgan institutsional o`zgarishlar bilan bevosita bog`liq. Iqtisodiyot tarmoqlarida samaradorlikni oshirishga ta’sir ko`rsatuvchi omillardan mehnat resurslariga bugungi kunda talab juda katta. Real sektorning barcha tarmoqlarida samaradorlikni oshirish ishlab chiqarish resurslaridan oqilona foydalanish hamda ko`rsatilayotgan xizmat turlari mehnat unumdorligiga bog`liqdir. O`zbekiston Respublikasining Birinchi Prezidenti Islom Karimovning 2015 yilning asosiy yakunlari va 2016 yilda O`zbekistonni ijtimoiy-iqtisodiy rivojlantirishning ustuvor yo`nalishlariga bag`ishlangan O`zbekiston Respublikasi Vazirlar Mahkamasining majlisidagi ma’ruzasida ta’kidlanganidek: “2015-yilda mamlakatimizda 980 mingdan ortiq ish o`rni tashkil qilingan bo`lsa, shuning 60 foizdan ziyodi qishloq joylarda yaratildi. Kollejlarning 480 mingdan ortiq bitiruvchisi ish bilan ta’minlandi. Tijorat banklari tomonidan ularga o`z biznesini tashkil qilish uchun 280 milliard so`mga yaqin imtiyozli kreditlar ajratildi va bu 2014 yilga nisbatan 1,3 barobar ko`pdir. 2015 yilda iqtisodiyotimizni yuqori sur’atlar bilan barqaror rivojlantirishga erishganimiz aholi daromadlarini yanada ko`paytirish, odamlarimizning hayot darajasi va sifatini oshirish uchun mustahkam asos yaratdi.”