Tadbirkorlik qadimdan insonlar uchun o’z hayotini qurish, mustaqil ro’zg’or yuritish, tashabbuskorlik bilan mehnat qilib, oilasini, elu yurtining ravnaqini ta’minlash omili bo’lib kelgan. Qolaversa, ishbilarmonlik xalqimizning qon-qoniga singib ketgan ezgu fazilatdir. Ota-bobolarimiz o’z yeri, mulki, kasbu hunariga ega bo’lishgan. Shu o’rinda Sohibqiron Amir Temur bobomizning: “Azmi qat’iy, tadbirkor, hushyor, mard va shijoatli bir kishi mingta tadbirsiz va loqayd kishidan afzaldir”, degan teran ma’noli da’vatini eslash kifoya.