Tabiiy mineral sorbentlardan bentonitlar boshqa ma`danlar ichida alohida ahamiyatga egaligi bilan ajralib turadi. Ular mamlakatimizda zahirasining mo`lligi, arzonligi hamda xalq xo`jaligini turli tarmoqlarida keng qo`llanilishi bilan ajralib turadi. Jumladan, Navbahor tabiiy loyining uchta turi yuqori sifatga ega bo`lib, ularni modifikatsiya qilmasdan turib ham halq xo`jaligini turli (neftgaz quvurlarini burg`ulash suspenziyasi, tuproq strukturasini yaxshilash va sh.o`.) tarmoqlarida adsorbent sifatida qo`llash mumkin. Ammo tabiiy gilmoyalarni har doimo bunday hollarda qo`llanilishi samarador natijalarga olib kelmaydi. Shuning uchun hozirga kunda bir nechta usullar bilan ularni faollashtirib (sirt faol moddalar, kislotali, ishqorli, mikroto`lqinlar va h.k.) olingan adsorbentlar sanoatning 200 dan ortiq tarmoqlarida keng qo`llanilmoqda [1]. Ayniqsa, Navbahor ishqoriy bentoniti (PBV) tarkibida natriy ionlari ulushining ko`pligi, kation almashinuv sig`imining yuqoriligi, ulardan turli modifikatsiyalangan adsorbentlar tayyorlash imkoniyatini yaratmoqda.