Ўрта Осиё давлатлари узоқ даврлар мобайнида Хитой, Ҳиндистон, Эрон, Афғонистон ва Шарқдаги бошқа мамлакатлар ҳамда Россия давлати билан иқтисодий, сиёсий ва маданий алоқаларда бўлиб келдилар. Айниқса, Ўзбекистоннинг қўшни давлатлар билан ҳозирги кундаги яқин дўстона алоқаларининг илдизлари ана ўша узоқ тарихий даврга бориб тақалади.
Маълумки, XVI асрдан бошлаб Осиё ҳудудида иккита хонлик - Бухоро ва Хива хонликлари, XVIII аср бошларидан эса учинчи Қўқон хонлиги вужудга келган. Мазкур қўлланмада XVI-XIX аср биринчи ярмида учала хонлик - Бухоро, Хива ва Қўқон хонликларининг Хитой, Ҳиндистон, Эрон, Афғонистон ва Россия билан иқтисодий савдо алоқалари масалалари ўрин олган. Ушбу қўлланмани ёзишда маҳаллий манбалардан ва рус сайёҳлари, дипломатлари ва элчиларининг берган маълумотларидан, нашр қилинган рус ва ўзбек тилидаги китоблардан кенг фойдаланилди. Мазкур қўлланма Марказий Осиё халқлари тарихи III курс талабаларига Марказий Осиё халқлари тарихи курсини ўқитишда қўшимча ўқув адабиёти сифатида яратилди.