“Tarixi Bagʻdod” asari Abu Bakr Xatib Bagʻdodiyning eng muhim va yirik asarlaridan biridir. Kitob 7831 ta muhaddislar va boshqa ilm ahllari jamiyat va davlat arboblarining tarjimai hollarini oʻz ichiga olgan va ularning tarixini yoritib bergan. Xatib Bagʻdodiy oʻz asarida Bagʻdod tarixiga oid yozilgan va yoʻqolib ketgan asarlar haqida ham ma’lumot berib ketgan. Xususan, yagona yoki deyarli yolgʻiz asarlar haqida xabar berib oʻtgan. “Tarixi Bagʻdod”ning madaniy hayotdagi ahamiyati shunda namoyon boʻladiki, u olimlarning dars oʻtish usullari va yoʻllarini, ularning qiyoslarini, talabalar bilan olimlarning aloqalarini, X-XI asrlarda mashhur boʻlgan madrasalar ta’rifini, shuningdek, masjidlarda hadis oʻrgatish va dars oʻtish uchun olimlar majlislari va anjumanlarini yoritib bergan. Bundan tashqari “Tarixi Bagʻdod” olimlarning faoliyati va ba’zi islom shaharlaridagi fikriy harakat bilan boshqasining aloqasi koʻlamini oʻzida aks ettirgan.