Hozirgi kunda zamonaviy fors tili terminologiyasida, xususan, iqtisodiy terminlar boʻyicha ilmiy tadqiqotlar olib borish muhim ahamiyatga ega boʻlib, soʻz bilan termin orasidagi farqni aniqlash muammosi dolzarb masalalardan biri hisoblanadi. Fors tili terminalogiyasi boʻyicha bu muammo oʻz-oʻzidan Erondagi til va adabiyot akademiyasining faoliyati bilan uzviy bogʻliqdir. Bizga ma’lumki, tildagi lugʻat fondi oʻzlashmalar hisobiga hamda tildagi mavjud soʻz yasash usullari orqali boyiydi. Bizning ushbu tadqiqotdagi asosiy maqsadimiz, hozirgi fors tilidagi iqtisodiy terminlarni yasashda tildagi mavjud soʻz yasash usullaridan yarimaffiksatsiya usuli orqali iqtisodiy termin yasashning oʻrni va ahamiyatini aniqlashdan iborat. Bu albatta fors tilidagi boshqa soʻz yasash usullari ichida yarimaffiksatsiya usulining iqtisodiy termin yasashdagi ahamiyatini ham oʻz ichiga qamrab oladi.