Тил ҳодисаларини инсон, унинг тафаккури ва дунё ҳақидаги тасаввури билан яқин ўзаро алоқада ўрганишга қаратилган антропоцентрик парадигманинг гуманитар фанларга татбиқ этилиши ҳозирги замон тилшунослигининг турли соҳаларида воқеликни концептуаллаштириш ва категориялаштириш жараёнлари фаол тадқиқ этилишини белгилади. Олимлар эътироф этишича, категориялаштиришнинг асосий шакли ва концептуаллаштиришнинг бош воситаси концептдир. Мазкур ҳодиса кўп сонли олимлар, шу жумладан А. Вежбицкая, С.А. Аскольдов, Д.С. Лихачев, Н.Д. Арутюнова, Ю.С. Степанов, Н.Ю. Шведова, В.А. Маслова, З.Д. Попова, И.А. Стернин, В.В. Колесов, В.И. Карасик ва бошқалар томонидан тадқиқ этилган.