Dunyo tillaridan eng sharafli va o`z o`rniga ega bo`lgan, hamda eng qiyin va mukammal tillardan biri hisoblangan til - bu arab tilidir. Arab va o`zbek tillari turli xil til oilalariga mansub bo`lsada, arab tili o`zbek tiliga begona tillardan emas. Chunonchi, bizning bir qancha ulug` olim-u fuzalo ajdodlarimiz aynan arab va fors tillarida ijod qilishgan. Shuni ta’kidlash lozimki, o`rta asrlarda o`zbek tilidagi so`zlarning 60-70 foizi arab tilidan kirib kelgan so`zlarni tashkil etgan. Bu juda katta ko`rsatkichdir. Lekin hozirgi kunimizga kelib, bu so`zlar bir qancha qisqarganini ko`rishimiz mumkin. Aniqroq aytadigan bo`lsak, hozirgi o`zbek tilidagi so`zlarning 25-30 foizini arab tilidan o`zlashgan so`zlar tashkil etadi.