Сийдик кислотаси (СК) тўпланиши касаллиги – подагра эркакларда энг кўп тарқалган бўғимларнинг яллиғланиш касаллиги бўлиб, бу касаллик билан катта ёшдаги эркакларнинг 2–4% и касалланади. Подагра нафақат ревматологиянинг долзарб муаммоларидан бири, балки умумтиббий муаммо ҳам ҳисобланади. Ушбу далил подагра билан касалланиш даражасининг ўсиб бораётганлиги билан боғлиқ. Бунда меҳнат қобилиятининг йўқотилиши нафақат таянч-ҳаракат аппарати зарарланиши, балки касалликда висцерал зарарланиш, жумладан, улар орасида етакчи ўринлардан бирида турадиган жигар зарарланиши билан боғлиқ.