O`zbekiston erishgan mustaqillik o`zbek xalqi milliy o`zligini anglashga, uning ma’naviy dunyosiga, demakki, san’atiga ham bevosita ta’sir ko`rsatdi. Mafkuraviy tazyiqlardan holi bo`lish va ijod erkinligiga erishish badiiy jarayonning muhim omillaridan sanalib, u ijodkorlarga yangi plastik shakllarni yaratish va turli uslubiy yo`nalishlarda ijod qilishdek qulay sharoit tug`dirdi. Ijod erkinligi qonun bilan kafolatlandi, bu esa iste’dodli rassomlar imkoniyat chegaralarini buzib tashladi.
Istiqlol natijasida dastur, falsafiy va estetik cheklanmalardan xoli erkin ijod imkoniyati yuzaga keldi, barcha san’at turlarida bo`lgani kabi milliy tasviriy san’at rivojida ham yangi bosqich boshlandi. Endilikda bu sohada eski tuzum san’atiga xos realistik talqin va ijtimoiy mavzu badiiy asarning asosiy va majburiy unsuri bo`lmay qoldi. Aksincha rassomning badiiy mahorati va olamni o`z ichki kechinmalaridan kelib chiqqan holda badiiy idrok etish masalasi rangtasvir san’atida birinchi o`ringa chiqdi.