Morfonologiya - til biliminiń eń jas tarawı bolıp, ol XX ásirdiń 30-jıllarında qáliplesti. Al túrkiy tilleri morfonologiyası boyınsha dáslepki izertlew jumısları XX ásirdiń 70-jıllardıń ortalarınan baslap jazıla basladı. Qırǵız tili morfonologiyası boyınsha izertlew jumısın júrgizgen T.Sadıqovtıń kórsetkenindey, túrkiy tillerdiń morfonologiyası házir qáliplesiw basqıshında tur. Solay da morfonologiyalıq izertlewlerdiń predmeti hám wazıypaları, fonologiya menen morfologiyanıń óz ara baylanısı, morfonologiyanıń birligi hám t.b. máseleler ele jetkilikli dárejede anıqlanbadı.