Ózbekistan Respublikası óz ǵarezsizliginiń dáslepki kúnlerinen baslap-aq, ata-babalarımız tárepinen kóp ásirler dawamında dóretilgen biybaha miyraslarımızdı qayta tiklew hám onı xalqımızdıń sanasına sińdiriw mámleketlik siyasatımızdıń baslı baǵdarlarınıń birine aylandı. Turmısımızdıń barlıq salalarında ámelge asırılıp atırǵan keń kólemli reformalardıń nátiyjeliligi dáslep ruwxıy dúnyamızdıń tikleniwi, bay táriyxıy miyrasımızdıń tereń úyreniliwi, ilim hám tálimniń rawajlanıwı, eń áhmiyetlisi, jámiyet oy-pikiriniń ózgeriwi hám joqarılawı menen ajıralmas baylanıslı.