Ўзбекистон аҳолисини озиқ-овқат маҳсулотлари билан таъминлаш сиёсий, иқтисодий ва ижтимоий аҳамиятга эга бўлиб, қишлоқ хўжалигида хом ашё ва озиқ-овқат товарлари ишлаб чиқариш билан узвий боғлиқдир. Қишлоқ хўжалигида ислоҳотларни янада чуқурлаштириш ва иқтисодий муносабатларни эркинлаштириш озиқ-овқат бозорининг турли даражада шаклланишига олиб келмоқда. Мамлакатимизда амалга оширилган чора-тадбирлар натижасида озиқ-овқат хавфсизлигига, жумладан, дон мустақиллигига эришилди. Яқин келажакда озиқ-овқат бозорини барқарор ривожлантиришга кўп жиҳатдан ҳудудларнинг мавжуд имконият ва омилларидан, ўзига хос хусусиятларидан самарали фойдаланиш ҳисобига эришиш мумкин. Бунинг учун «...қишлоқ хўжалиги самарадорлигини ошириш, соҳа инфратузилмасини ривожлантириш, қишлоқда аҳоли турмуш даражаси ва маданиятини юксалтириш учун ҳали жуда кўп ишлар қилиш керак».