Ҳозирда чет тилларни ўрганишга берилаётган алоҳида
эътибор таълим жараёнини такомиллаштиришга қаратилган
турли дарслик, ўқув, ўқув-услубий қўлланмаларни яратишга
эҳтиёж туғдирди. Бугунги кунда республикамиз олий ўқув
юртларида хитой тили ўқитилаётганига қарамай, бу йўналишда
ўзбек тилида яратилган манбалар деярли йўқ. Натижада рус ва
инглиз тилини билмайдиган талабалар учун хитой тилини
ўрганишда айниқса, баъзи муаммолар пайдо бўлмоқда. Шу сабабли
СамДЧТИ да хитой тили ва адабиётига доир қатор қўлланмалар
яратиш дастури ишлаб чиқилган.
Мазкур ўқув-услубий қўлланма хитой тилини ўрганувчи
талабалар учун ана шундай дастур асосида яратилди. Бу
қўлланмани ёзишда рус, уйғур, инглиз тиллардаги манбалар ва
интернет таълимий сайтларидан фойдаланилди. Қўлланма шу
соҳадаги дастлабки уринишлардан бири бўлганлиги учун айрим
камчиликлардан холи бўлмаслиги табиий. Қўлланма мазмуни ва
мундарижасини такомиллаштириш юзасидан билдириладиган
фикр-мулоҳазалар келгуси ишларимизда ҳисобга олинади.