Истиқлолнинг дастлабки йилларида, Ўзбекистон мустақил тараққиёт йўлини танлаган, қатор, бир-биридан қийин, оғир муаммоларни ҳал қилишга чоғланган, турли қарама-қаршиликлар ва зиддиятларни енгиб бораётган изтиробли бир паллада «Литературная газета» газетасининг мухбири Президент Ислом Каримовдан интервью ола туриб: «Дунёни гўзаллик қутқаради»,– деган гап бор. Сиз бунга қандай қарайсиз?» – деб сўрайди. Унга жавобан Президент: «Дунёни гўзаллик ва эзгулик қутқаради»1, – деб жавоб беради. Ана шу икки оғизгина гапда олам-олам маъно борлиги бугун кўзга яққол ташланмоқда. Мустақил ҳаётимизга таҳдид кучайиб, халқаро терроризм, наркобизнес, диний фундаментализм авж олиб бораётган бир пайтда бу ҳикматнинг янгидан-янги қирралари, бизга номаълум бўлган маънолари очилиб бормоқда.