«To`ydan keyin bolamning mehrini birov bilan bo`lishish – bu dahshat!» Kundalik hayotimizda deyarli har bir yangi oila ona rashki bilan to`qnashadi. Aslida har qanday ona farzandini o`zgalardan qizg`anadi. Lekin bu tuyg`u ko`pincha hukmdor tabiatli yoki shaxsiy hayotini yo`lga qo`yolmagan, o`zini faqat farzand tarbiyasiga bag`ishlagan ayollarda, yolg`iz onalarda juda yaqqol ko`zga tashlanadi. Ular doim farzandini nazorat ostida ushlashga intiladilar va uning oila qurish niyatini vahima bilan kutib oladilar. Chunki bu ona hayotida kuchli raqib paydo bo`lishini anglatadi va tabiiyki, to`ydan keyin erkatoyi faqat unga quloq soladigan itoatli o`g`il bo`lmay qolish xavfi taxdid soladi. Xullas onaning bunday xavotirlari bir so`z bilan «rashk» deyiladi. Kimlardir bunga ko`nikib, oila inqirozining tomoshabiniga aylansa, yana kimdir isyon ko`taradi yoki bu vaziyatdan chiqish yo`llarini izlaydi.