Машина қанчалик замонавий ва мукаммал бўлмасин, у ишга тушганидан кейин, унинг ҳар хил табиатга эга бўлган камчиликлари намоён бўлади. Бу камчиликлар қўшимча меҳнат сарфлаб йўқотилади. Машинанинг ишлаш вақти кўпайган сари, яъни деталлар юзасининг ейилиши ва материалларнинг чарчаши ошган сари машинани ишга яроқли қилиб туриш учун сарфланадиган меҳнат миқдори хам ошиб, бу меҳнат таркибий жихатдан мураккаблашиб бораверади. Шунинг учун ҳам машинада бўладиган ҳар қанақанги носозликларни ўз вақтида йўқотиш олий даражадаги заруриятли иш бўлиб хисобланади.