Ўқитувчининг дарсга тайёргарлик кўришида ўқув режасини таҳлил қилиши бошқа ўқув дастурий ҳужжатлар билан ишлаши учун бирламчи маълумотларни берувчи биринчи босқичдир. Ўқув режасини таҳлилида, ўқитувчи ўқувчилар ўрганадиган фанлар тизимида ўз фанининг ўрнини аниқлайди ва шу асосида ўқув жараёнига фанлар аро боғланишни режалаштиради ва жорий этади. Фан учун ажратилган соатлар миқдори ва уларнинг семестрлар бўйича тақсимланиши унга материалнинг ҳажмини ва мураккаблигини тахминин баҳолашга имкон беради. Фаннинг муҳимлиги даражасини унга ажратилган соатлар миқдорига, ўтиладиган семестрлар сонига, курс лойиҳаси(иши)га, шунингдек малакавий тавсифномада келтирилган ўқувчилар эгаллаши лозим бўлган билим ва малакаларга қараб фикр юритиш мумкин.