Axborot-kommunikatsiya texnologiyalaridan ijtimoiy va iqtisodiy sohalarida keng foydalanish, sohani rivojlantirishning asosiy omillaridan biri hisoblanadi. Ayniqsa, davlat boshqaruviga axborot-kommunikatsiya texnologiyalarini keng joriy qilish O`zbekistonning istiqboldagi taraqqiyotini belgilashda muhim ahamiyat kasb etmoqda. Hozirgi kunda mamlakatimizda milliy axborot tizimini shakllantirish, iqtisodiyot va jamiyat faoliyatining barcha sohalarida zamonaviy axborot texnologiyalari hamda telekommunikatsiya vositalaridan foydalanish ko`lamini kengaytirish, elektron hukumatni shakllantirish borasida tizimli islohotlar amalga oshirilmoqda. Shuningdek mamlakatimizda elektron hukumatni shakllantirishning huquqiy asoslarini mustahkamlash maqsadida "Axborot olish kafolatlari va erkinligi to`g`risida”gi, "Telekommunikatsiyalar to`g`risida”gi, "Axborotlashtirish to`g`risida”gi, "Elektron raqamli imzo to`g`risida”gi, "Elektron hujjat aylanishi to`g`risida”gi, "Elektron to`lovlar to`g`risida”gi, "Davlat hokimiyati va boshqaruvi organlari faoliyatining ochiqligi to`g`risida”gi qonunlar qabul qilindi.