XX asr oxirida “axboriy jamiyat” va “axborotlashuv” atamalari nafaqat mazkur soha vakillari, balki siyosatchilar, iqtisodchilar, olimlar va pedagoglar lug’at boyligidan ham mustahkam o`rin egalladi. Ko`p hollarda bu tushuncha fuqarolik jamiyati platformasida yangi evolyutsion odimni amalga oshirib XXI asrga axborotlashgan jamiyat sifatida munosib kirib borish imkonini beradigan axborot - kommunikatsiya texnologiyalari, telekommunikatsiya vositalarining rivojlanishi bilan uyg’un holda ta`riflanadi. Dunyo yangi davr-axborot asriga, elektron iqtisodiy faoliyat, tarmoq jamoatlari va chegarasiz tashkilotlar asriga qadam qo`ydi. Yangi davrning boshlanishi jamiyat hayotining iqtisodiy va ijtimoiy tomonlarini tubdan o`zgartirishi tabiiy. Bunday o`zgarishlar informatsion dunyodagi inson roliga bevosita ta`sir ko`rsatadi. Boisi inson jamiyatning axboriy-texnik xususiyatlari yo`nalishiga mos ravishda o`zgarib boradi.