Oliy o`quv yurtlari oldida turgan asosiy vazifalardan biri O`zbekiston Respublikasida qabul
qilingan «Kadrlar tayyorlash Milliy Dasturi»da belgilangan talablar asosida fanlar bo`yicha
zamonaviy mukammal darsliklar yaratish va shu asosida talabalarga chuqur nazariy bilimlar berib,
ularni puxta amaliy malakalarga ega bo`lgan mutaxassislar qilib tayyorlab yetishtirishdir.
Zamonaviy texnikaga doir bilimlarni mukammal egallashning shartlaridan biri grafik
savodxonlikni oshirish, ya’ni chizmalarni o`qish va bajarishni bilishdir. Shu boisdan chizmalar
chizishning asosi bo`lgan – chizma geometriya fanini mukammal o`rganishni talab etadi.
Keyingi yillarda fundamental fanlarni, shu jumladan, «Chizma geometriya» fanini o`qitishda va
uning asoslarini texnika va qurilishda qo`llash bilan bog`liq bo`lgan ko`pgina masalalar darslikka
kiritilgan. Endilikda shu o`zgartirishlarni hisobga olgan holda, oliy texnika o`quv yurtlarida o`qitilib
kelingan «Chizma geometriya kursi»ni ham ba’zi yangi materiallar bilan to`ldirish va grafik ishlarni
kompyuterlashtirish bilan bog`liq bo`lgan darslik yaratish zaruriyati tug`ildi.