O`zbekistonning zamonaviy ishlab chiqarish sanoati yirik og`ir industriya tarmoqlaridan biri bo`lib, vatanimizning muhim energetika bazasidir. O`zbek mutaxassislari neft bo`yicha 100 yildan ortiq, gaz bo`yicha yarim asrlik ilmiy va amaliy bilimga hamda tajribaga egadirlar. Bu tarmoqda sezilarli darajada ilmiy texnik potensial yaratilgan va uni rivojlantirishda anchagina yutuqlarga erishilgan.
1990-1995 yillarda bu tarmoq strukturasini mukammallashtirish bo`yicha texnik jixozlanish va qayta yangi asbob-uskunalar bilan qurollanish, konlarni ishga tushirish hajmini jadallashtirish va ularni oshirish (ko`paytirish) uchun ulkan ishlar qilindi. Bu davr ichida MDH da neft va gaz qazib chiqarishning kamayishi ro`y bergan bo`lsa, O`zbekistonda neft-gaz qazib chiqarish barqarorlashgan va so`ngra dinamik o`sishiga erishildi.