Мамлакатимизда қишлоқ хўжалиги ишлаб чиқариши асосан суғориладиган ерларда олиб борилади. Ялпи қишлоқ хўжалиги маҳсулотларининг 90 фоизи суғориладиган ерлардан олинмоқда. Мамлакатда бир йилда ўртача 51 млрд. кубометр сув олинади, унинг 92 фоизи қишлоқ хўжалигида, қолган қисми эса аҳоли таъминоти, саноат, курилиш ва иқтисодиётнинг бошқа тармоқларида ишлатилмоқда. Аҳоли сонининг ўсиши, янги саноат корхоналари қурилиши туфайли муттасил ошиб бораётган сувга бўлган талаб қишлоқ хўжалигида берилаётган сув ҳисобидан қондирилмоқда.