Farg’ona vodiysi XVII – XIX asrlarda O’rta Osiyo hududida mavjud bo’lgan davlatlar – Ashtarxoniylar va Qoqon xonligining siyosiy, ijtimoiy-iqtisodiy va madaniy hayotida muhim rol’ o`ynagan. Ashtarxoniylar sulolasi davrida va Qo`qon xonligi tashkil topgan davrda Farg’ona vodiysida Andijon, Marg’ilon, O`sh, Xo`jand, Quva kabi yirik shaharlar o`lkaning siyosiy, ijtimoiy-iqtisodiy hayotida muhim ahamiyat kasb etgan. Bu shaharlarda savdo-sotiq, hunarmandchilik, madaniyat o`ziga xos tarzda rivoj topgan. Qo`qon xonligi tashkil topganidan so`ng xonlikning boshqa hududlari qatori Farg’ona vodiysida ham yangi shaharlar paydo bo`lgan, ba`zi kichik shaharlar yirik markazlarga aylangan. Bular jumlasiga Qo`qon, Namangan, Shahrixon, Asaka va boshqa shaharlarni misol qilish mumkin. Yuqoridagilardan kelib chiqqan holda, XVII – XIX asrning 1-yarmida Farg’ona vodiysi shaharlarida ijtimoiy-iqtisodiy va madaniy hayotini o`rganish va ilmiy xulosa qilish mavzuning dolzarbligini belgilaydi.