Инсоният жадал тараққиёт йўлига юз бурганидан буён бадиий тафаккурга кўпроқ эҳтиёж сеза бошлади. Бу жараён шунга олиб келдики, бугун санъат инсон ижтимоий ҳаётининг ажралмас бир қисмига айланди. Чунки санъат ҳаётни чуқур ўрганишда, уни гўзаллик меъзонлари нуқтаи назаридан идрок этишда ҳамда нафосат оламининг илғаб олиш мураккаб бўлган нозик сир-асрорларини англаш ва ҳис этишда яқин кўмакдошдир. Санъат инсонларнинг образли тасаввури, тафаккур дунёсининг манбаи бўлиб хизмат қилади. Айни пайтда у ҳаётнинг бадиий тасвири, акс садосидир.