XXI асрнинг ўзига хос хусусиятларидан бири – бу информацион технологияларнинг тараққиёти, информация алмашинувининг тезкорлиги, дунёда юз бераётган воқеа – ҳодисаларнинг глобаллашуви ва интеграциялашуви жадал суръатлар билан амалга ошиб бораётганлигидадир.
Инсоният ўзининг фаолиятида ахборотларни қабул қилиш, йиғиш, сақлаш, узатиш ва қайта ишлаш билан шуғулланади. Ушбу амалларнинг компьютерга юклатилиши ва уларни амалга ошириш усул ва воситаларининг пайдо бўлиши, информацион технологиянинг алоҳида фан сифатида ажралиб чиқишига сабаб бўлди. Информацион технологиянинг асосий ўзагини компьютер ташкил этиб, унинг техник таъминотини таъминлайди. Ахборотни қайта ишлашни ташкил этиш учун информацион технологиянинг техник таъминоти ягона бўлмай, балки ахборот таъминоти, ташкилий таъминоти ва дастурли таъминоти биргаликда қаралиши керак.