Мустақиллик йилларида амалга оширилаётган анъанавий меъморчилигимиз тараққиёти кўп жиҳатдан наққошлик санъатининг келажакдаги такомили билан муштаракдир. Наққошлик санъатининг Мустақиллик даврида Ўзбекистон архитектурасидаги муҳим ўрнини Президентимиз Ислом Абдуғаниевич Каримов Тошкентдаги Темурийлар даври тарихи ва санъати музейининг очилишида сўзлаган нутқида алоҳида таъкидлаб ўтган эдилар: "Музей архитектураси ва унинг ички деворий нақшлари Мустақил Ўзбекистонимиз замонавий меъморчилигининг катта ютуғидир. Уни ишлаган меъморлар, рассомлар, қурувчи ва наққош усталар юртимизнинг фахри десам хато қилмайман". Дарҳақиқат, наққошликнинг архитектура-даги, айниқса миллий меъморчиликдаги роли беқиёс. Шундай экан наққошлик санъатини Республикамизда янада ривожлантириш, уни чуқурроқ ўрганиш ва такомиллаштириш давримизнинг долзарб масалаларидан биридир.