Фарғона шаҳрида бўлиб ўтган Ўзбекистон География жамиятининг VI съездига (2003 йил, ноябр) ҳам уч йил ўтди. Бу қисқа вақт давомида мустақил республикамиз ижтимоий-иқтисодий ҳаётида туб ўзгаришлар юз берди, мамлакатимизнинг геосиёсий мавқеи ва унинг жаҳон ҳамжамиятида тутган ўрни ва нуфузи янада мустаҳкамланди. Шу даврда, бошқа фанлар қаторида, география фани ҳам ривожланиб борди ва у ҳозирги кунда ҳаракатдаги олам сирларини ўрганиб бормоқда.
Кўрилаётган даврда географ олимларимизнинг сафи кўпайди, янги ўқув қўлланма ва дарсликлар, харита ва атласлар яратилди, География жамиятининг вилоятдаги бўлимлари ишлари анча фаоллашди. Уларнинг саъй-ҳаракати туфайли Фарғона, Наманган, Самарқанд, Бухоро. Сурхондарё вилоятларида илмий-амалий анжуманлар ўтказилди, марҳум устозлар ёдга олинди ва уларнинг руҳлари шод этилди.