Гымылды херекетиң белли бир замандадыгыны билдирип, өзлериниң багланян
атларының херекет айратынлыгыны аңлатмага хызмат эдйəн ишлик формасына ортак ишлик
дийилйəр.
Ортак ишлик диен термин ерликли берлен, себəби бу исимлер билен ишликлериң
ортасында дуран категориядыр. Оларың исимлере голай тарапы хем бар, ишликлере голай
тарапы хем бар. Онуң сыпатлара голай тарапыны ашакдакы ялы гөркезмек болар.
1. Ортак ишликлер хем, сыпатлар хем сөзлемде эсасан айыргыч болуп уланылярлар.
Бейле уланыланларында болса, оларың икиси-де көпленч меңзеш сорага жогап болярлар.
Меселем: Зехинли оглан (нəхили оглан?). Окажак оглан(нəхили оглан?).
2. Буларың икиси хем атлара багланып, олары айыклап геленлеринде, олардан өңүрти
гелип, сөзлемде өзлери хич бир үйтгедижи гошулма билен үйтгешмейəрлер. Меселем:
Овадан халы, овадан халының, овадан хала, овадан халыны, докалан халы, докалан халының,
докалан хала, докалан халының ве ш. м.