Мустақиллик йилларида Ўзбекистонда амалга оширилган иқтисодий ислоҳатларда қишлоқ хўжалигини иқтисодий ривожлантириш асосида қишлоқ аҳолиси фаровонлигини оширишга алоҳида эътибор бериб келинмоқда. Айниқса бу борада Ўзбекистон Республикаси Президенти И.А. Каримов таклифига мувофиқ 2009 йилнинг ”Қишлоқ тараққиёти ва фаровонлиги йили” деб аталиши, узоқ муддатга мўлжалланган махсус Давлат дастурининг ишлаб чиқилиши ва тасдиқланиши, уни жадал амалга оширишнинг бошлаб юборилиши қишлоқлар қиёфасини ва иқтисодиётини тубдан ўзгартириш даврини бошлаб берди.
Ўзбекистонда бугунги кунга келиб ислоҳатлар маркази қишлоқ хўжалигига кўчирилди. Бунинг сабабини биз президентимизнинг “Ўзбекистон ХХI аср бўсағасида: ҳавфсизликка таҳдид, барқарорлик шартлари ва тараққиёт кафолатлари” асарида (1997)ги фикр-мулоҳазалардан ҳам билсак бўлади: - “Ҳозирги вақтда айнан иқтисоднинг аграр секторида катта-катта заҳиралар мавжуд. Уларни ишга солиш яқин вақт ичидаёқ сезиларли натижалар бериши мумкин. Бугунги иқтисодий ўзгаришнинг якуни, ўзгаришлар жараёнлари аграр секторни қанчалик чуқур боришига боғлиқ бўлади ”