. Millatni millat qilib, nomini dunyoga tanitadigan asosiy omillardan biri – uning ma’naviy boyligidir. Qolaversa, ma’naviyat – insonni inson, millatni millat qiladigan, ularning qiyofasini belgilab beradigan ulkan qudratga ega. Ana shunday qudratli kuchga ega bo`lgan, teran ma’noli tushunchani o`sib-ulg`ayib, kamol topayotgan yosh avlod ongi va shuuriga singdirish va bu orqali Vatan, xalq va millat manfaati yo`lida kamarbastalik bilan xizmat qila oladigan, har tomonlama yetuk, barkamol avlodni tarbiyalab, voyaga yetkazish – bugungi kunda ta’lim-tarbiya sohasi oldida turgan eng ustuvor vazifadir. Har tomonlama yetuk, ma’naviy barkamol inson ota-onasi, farzandlari, qarindoshlari, xullas, butun oila a’zolari, qo`ni-qo`shnilari, mahalla-kuyi, butun mamlakat va xalq farovonligi haqida qayg`uradi, tevarak-atrofini o`rab olgan insonlar unga kerak bo`lgani singari, o`zi ham ularga kerakli kishi bo`lishga intiladi. Odob-axloqi, fe’l atvorini yoqimli qilishni insoniy burch deb hisoblaydi, ota-bobolardan yodgor bo`lib qolgan madaniy merosni qadrlaydi, milliy qadriyatlarni e’zozlaydi va ularga sodiq bo`lib qoladi. Unda vatanparvarlik, xalqparvarlik, insonparvarlik tuyg`ulari barqaror bo`ladi. Ana shunday har tomonlama yetuk, barkamol avlodni tarbiyalashda ta’lim muassasalarida o`qitilayotgan “Milliy g`oya: asosiy tushuncha va tamoyillar” fanining alohida o`rni bor. Mazkur fanning, aniqrog`i, milliy g`oyaning jamiyat taraqqiyotida qanchalar ahamiyatli ekanligini, prezidentimiz I.A. Karimovning quyidagi mulohazalari bilan izohlash o`rinli: “Milliy g`oya va istiqlol mafkurasi haqida gap borar ekan, biz nihoyatda keng qamrovli, murakkab, serqirra, insoniyat tarixida aniq va mukammal ifodasi, tugal namunasi hali hanuz yaratilmagan tushunchalarni o`zimizcha tasavvur qilishimiz kerak, deb o`ylayman.