Эркин иқтисодий зоналарда чет эл инвестициясини ҳуқуқий тартибга солишнинг фуқаролик-ҳуқуқий асосларини, ушбу муносабатлар субъекти сифатида хорижий тадбиркорнинг ҳуқуқий мақомини очиб бериш, инвестиция фаолияти субъектларини фуқаролик-ҳуқуқий тартибга солишга қаратилган ҳаракатдаги қонунчиликни қўллаш амалиётини мажмуавий ва ҳар томонлама таҳлил қилиш, илмий хулосалар ва тавсиялар ишлаб чиқиш тадқиқот ишининг мақсадини ташкил қилади.
Ушбу мақсадлардан келиб чиққан ҳолда тадқиқотнинг вазифалари сифатида қуйидагиларни кўрсатиш мумкин: бугунги глобаллашув шароитида эркин иқтисодий зоналарни иқтисодий аҳамиятини, улар фаолиятини ҳуқуқий тартибга солиш масалаларини ўрганиш ва таҳлил қилиш; халқаро муносабатларда чет эл инвестициясининг хусусиятлари ва миллий давлатлар иқтисодиётига таъсирини, чет эл инвестицияларини янада кенгроқ жалб қилиш масалаларини назарий жиҳатдан таҳлил қилиш; эркин иқтисодий зоналарга чет эллик инвесторларни жалб қилишни халқаро иқтисодий ҳамда ҳуқуқий муносабатлар тизимида тутган ўрни ва унинг ҳуқуқий таъминотини таҳлил қилиб, уларни янада такомиллаштириш бўйича таклифлар бериш; Ўзбекистон Республикасида ташкил этилган эркин иқтисодий зоналарда чет эл инвестицияси асосида амалга оширилган савдо-иқтисодий ҳамкорлигининг халқаро шартномалар ёрдамида тартибга солинишини таҳлил қилиш, бу борада фикр-мулоҳазалар билдириш; эркин иқтисодий зонада инвесторлар фаолияти ҳамда уларнинг ҳуқуқий мақомини ташкилий ҳуқуқий шаклларини таҳлил қилиш; эркин иқтисодий зоналардаги чет эл инвестиция муносабатларини халқаро хусусий ҳуқуқий қонунчиликни такомиллаштириш масалаларини ўрганиб, тегишли таклиф ва тавсифлар ишлаб чиқиш.