Болаларда жигар касалликлари ичида жигарнинг диффуз касалликларидан кейинги ривожланган портал гипертензия ва унинг асоратлари ечими алохида ўринни эгаллайди. (Алиев М.М 2009., Леонтьев А.Ф. 1996., А.Ю.Разумовский 2008). Болаларда жигар циррози портал гипертензиясида беморларни ўз вақтида тўғри ташхислаб, амалиёт турини гемодинамика асосларида танлаш болалар гепотопортал хирургиясининг энг долзарб муаммоларидан саналади (Алиев М.М 2011., Гафуров А.А. 2009., А.Ю.Разумовский 2014). ЖЦ жигар функционал холатининг ва гемодинамикасининг мураккаб бузилиши, жигар ичи ва жигар ташқи қон айланишининг қайта қурилиши ва авж олиб борувчи ПГ синдроми, спленомегалия ва гиперспленизм билан характерланади. Қон айланишининг мураккаб бузилишлари ва бу бузилишларни регуляция қилишга қаратилган компенсатор-мослашиш жараёнларининг химояловчи ёки шикастловчи омил эканлигини аниқлашдаги қийинчиликлар уларни рационал ва вақтида коррекция қилиш имкониятларини чегаралаб қўяди. Бундан ташқари, спленомегалия ва гиперспленизм патологик жараён натижаси бўлиб, кейинчалик касалликни ривожлантиришда асосий мезонлардан бирига айланиб қолади. Касаллик бошланишида мослашувчи холат бўлган ПГ синдроми кейинчалик жараённи янада чуқурлашувига олиб келади [Пациора М.Д. 1986].