Qoraqalpoq dostonlarining g`oyaviy-badiiy xususiyatlari

Xududiy jihatdan qadimdan Markaziy Osiyoning katta makonida yashovchi turkiy xalqlarning og`zaki va yozma so`z san`ati bir-biriga doimo ijodiy ta`sir o`tkazib kelgan. Turkiy xalqlar adabiyotlarining o`zaro aloqalarini to`g`ri anglash, tarixiy-adabiy jarayonda tutgan o`rnini belgilash adabiyotshunoslikning doimiy va dolzarb muammolaridan biri hisoblanadi. Amudaryo va Sirdaryoning quyi oqimida yashagan qoraqalpoqlar tarixan Markaziy Osiyo va unga yondosh mintaqalar xalqlari bilan doimo iqtisodiy, siyosiy, madaniy jihatdan mustahkam aloqada bo`lgan. Bu esa ushbu mamlakatlar xalqlari og`zaki va yozma ijodi, adabiy aloqalar tarixi va madaniyatiga ham faol ta`sir etgan, ular yaratgan bebaho badiiy qadriyatlar xazinasini bir-biridan bahramand etgan. Xalq og`zaki ijodiyoti haqida so`z yuritganda, albatta, o`zaro ta`sir jarayonlarini chetlab o`tish mumkin emas. Chunki qoraqalpoq xalq dostonlarining syujeti, g`oyaviy mazmuni, kompozitsiyasi, badiiyati, tili, jumladan, onomastikasida ham ana shu jarayonlar ta`siri yaqqol sezilib turadi.